प्रस, रौतहट, १७ वैशाख/
राजदेवी नगरपालिकाको ब्रह्मपुरी गाउँमा गएराति आगलागी भएर लाखौं मूल्य बराबरको क्षति भएको छ ।
राजदेवी नपा–९ ब्रह्मपुरीस्थित कालीमन्दिरनजीक जस्ताले छाएको चार कोठे पक्की घरमा आगलागी भएर रु १२ लाख बराबरको धनमाल जलेर नष्ट भएको पीडित घरधनी बच्चा सिंहले बताए ।
घरमा सबै सुतिरहेको अवस्थामा खाना पकाउने चुलोबाट आगो सल्केर आगलागी भएको सशस्त्र सीमा सुरक्षा बल नेपाल, हजमिनिया, रौतहटले जनाएको छ ।
आगलागी भएको खबर पाएपछि सशस्त्र प्रहरीको टोली र स्थानीय बासिन्दाहरूले आगलागी नियन्त्रणमा लिन प्रयास गरेका थिए ।
त्यसपछि गौर नगरपालिकाबाट आएको दमकलको मदतबाट आगो नियन्त्रण आएको सशस्त्र प्रहरी उपरीक्षक विक्रम हुमागाईंले बताए ।
आगलागीबाट मोटरसाइकल एक थान, साइकल तीन थान, लत्ताकपडा, खाद्यान्न, गरगहना, एक लाख नगदसहित चार कोठे घर जलेर नष्ट भएको बताइएको छ ।
प्रारम्भिक अनुसन्धानबाट रु १२ लाख बराबरको धनमाल जलेर नष्ट भएको सशस्त्र प्रहरीले जनाएको छ ।
