प्रस, परवानीपुर, ८ चैत/
तेस्रो परवानीपुर गोल्डकप फूटबल प्रतियोगिताको फाइनलमा वीरगंज युनाइटेड क्लब र हेटौंडा फूटबल एकेडेमी मकवानपुर भिड्ने भएका छन् ।
शक्ति युवा क्लबको आयोजनामा जारी प्रतियोगिता अन्तर्गत बिहीवार सम्पन्न दुईवटा सेमिफाइनल खेलमा वीरगंज युनाइटेड क्लब र हेटौंडा फूटबल एकेडेमी मकवानपुर विजयी भएर फाइनलमा पुगेका छन् ।
हिजो वर्षाका कारण स्थगित परवानीपुर खेलमैदानमा आजको पहिलो सेमिफाइनल खेलमा वीरगंज युनाइटेड क्लबले वीरगंज युथ एकेडेमीलाई सडेन डेथमा शून्यका विरुद्ध एक गोलअन्तरले पराजित गर्दै फाइनलमा प्रवेश गरेको थियो ।
निर्धारित समयमा दुई/दुई गोलको बराबरी खेलेपछि टाइब्रेकरबाट निर्णय लिइएको थियो । टाइब्रेकरमा पनि दुवै टीमले समान तीन/तीन गोल गरेका थिए । त्यसपछि सडेन डेथमार्फत निर्णय गर्दा वीरगंज युनाइटेड क्लबले वीरगंज युथ एकेडेमीलाई शून्यका विरुद्ध एक गोलअन्तरले हराएको हो ।
यस खेलको ‘म्यान अफ दी म्याच’ वीरगंज युनाइटेड क्लबका गोलकीपर दिलमणि चौधरी घोषित भए र उनलाई पर्सागढी निवासी जीतेन्द्र यादवले नगद दुई हजार एक सयसहित शिल्ड प्रदान गरेका थिए ।
यसैगरी, आज सम्पन्न दोस्रो सेमिफाइनल खेलमा हेटौंडा फूटबल एकेडेमी मकवानपुरले बाग्मती फूटबल क्लब सर्लाहीलाई एकका विरुद्ध दुई गोलअन्तरले पराजित गर्दै फाइनलमा प्रवेश गरेको थियो ।
पहिलो हाफको २७औं मिनेटमा हेटौंडाका खेलाडी प्रकाश पुनले पेनाल्टी गोल गरेका थिए । खेलको ३६औं मिनेटमा हेटौंडाकै दिवस श्रेष्ठले दोस्रो गोल गरे । बाग्मतीका कपिल मगरले खेल समाप्तीको दुई मिनेट अघि एक गोल गर्न सके ।
दोस्रो सेमिफाइनलमा हेटौंडाका कप्तान प्रताप तामाङ ‘म्यान अफ दी म्याच’ घोषित भए । उनलाई नेकपा एमालेका मधेस प्रदेश कमिटीका सदस्य मोबिन आलमले नगद दुई हजार एक सय र शिल्ड प्रदान गरे ।
भोलि शुक्रवार निजगढ महिला फूटबल क्लब र वीरगंज युथ महिला फूटबल टीमबीच मैत्रीपूर्ण फूटबल प्रतियोगिता हुनेछ भने प्रतियोगिताको फाइनल खेल चैत १० गते शनिवार हुनेछ ।
