प्रस, वीरगंज, ८ चैत/
जीतपुरसिमरा टी–२० कप क्रिकेट प्रतियोगिता अन्तर्गत बिहीवार भएको खेलमा जनकपुर पिस फाउन्डेशनले खुकुरी क्रिकेट क्लब भैरहवालाई ४८ रनअन्तरले पराजित गरेको छ ।
समूह ‘बी’ अन्तर्गतका खेल हिजो वर्षाका कारण स्थगित भएपछि आज सम्पन्न गरिएको हो । जनकपुरले टस जितेर ब्याटिङ गर्दै निर्धारित २० ओभरमा आठ विकेट गुमाएर १३२ रन बनाएको थियो । जनकपुरका हिमांशु दत्तले ४७, अखिलेश ठाकुरले २५, रूपेश यादवले अविजित १८, चन्दन यादवले १७ र परशुराम यादवले १४ रन बनाएका थिए । भैरहवाका सन्तोष यादवले चार विकेट लिए भने अजय चौहानले दुई र इकलख वर्सीले एक विकेट लिए ।
जनकपुरले दिएको १३३ रनको लक्ष्य पछ्याएको भैरहवा १७.६ ओभरमा नौ विकेट गुमाउँदै ८४ रनमा सीमित भयो । भैरहवाका लागि अमर मिश्रले २५, प्रकाश गिरीले १४, सन्तोष यादवले १३, मनीष थापाले १२ र निश्चल चौधरीले १० रन बनाएका थिए । अन्तिम विकेट बाँकी छँदा भैरहवाका महेश भार घाइते भएपछि भैरहवाले नौ विकेटमैं इनिङ समाप्तिको घोषणा गरेपछि जनकपुर ४८ रनले विजयी भएको आयोजकले जनाएको छ ।
जनकपुरका रूपेश यादव, रोहन यादव र अभिजीत मण्डलले दुई/दुई विकेट लिए भने विशाल सुस्लिङ, साइमोन रोय, बी धवन सहनीले एक/एक विकेट लिए । जनकपुरका कप्तान हिमांशु दत्त ‘प्लेयर अफ दी म्याच’ घोषित भए र उनलाई जीतपुरसिमरा उपमहानगरपालिकाकी वडाध्यक्ष चयन गुरुङले पुरस्कृत गरेकी थिइन् ।
जीतसँगै जनकपुरले प्रतियोगिताको फाइनलमा पुग्ने आशा जीवित राखेको छ । पहिलो खेलमा मकवानपुरसँग ३१ रनले पराजित जनकपुरलाई प्रतियोगिताको उपाधि होडमा उभिन भैरहवाविरुद्ध फराकिलो जीत आवश्यक थियो ।
अब भैरहवालाई पनि प्रतियोगिताको फाइनलमा पुग्न समूह ‘बी’को अन्तिम खेलमा भोलि शुक्रवार मकवानपुरविरुद्ध फराकिलो जीत निकाल्नुपर्ने हुन्छ । भोलिको खेलपछि यसको टुङ्गो लाग्नेछ । तर मकवानपुरले जितेमा समूह विजेता बन्दै फाइनलमा प्रवेश पाउनेछ र चैत १० गते शनिवार हुने फाइनलमा पर्सा क्रिकेट सङ्घसँग भिड्ने अवसर पाउनेछ ।
अभियान नेपालको आयोजना र जीतपुरसिमरा उपमहानगरपालिकाको सहयोगमा आयोजित प्रतियोगिताको विजेताले एक लाख र उपविजेताले ५० हजार नगद प्राप्त गर्नेछन् ।
