प्रस, वीरगंज, ३ चैत/
वीरगंज महानगरपालिका–१० वडा कार्यालयको आयोजना र घडीअर्वा स्पोट्र्स क्लबको सहयोगमा जारी दोस्रो वडास्तरीय क्रिकेट प्रतियोगिताको उपाधि कोशी टीमले जितेको छ ।
शनिवार भएको फाइनल खेलमा बाग्मती टीमले निर्धारित २० ओभरको खेलमा सबै विकेट गुमाएर १४९ रन बनाएको थियो । यो लक्ष्यलाई कोशी टीमले एक विकेटको नोक्सानीमा पूरा गर्दै नौ विकेटअन्तरले जीत हासिल गरेको थियो । समापन कार्यक्रमका प्रमुख अतिथि नगरप्रमुख राजेशमान सिंहले खेलकूदमा राजनीति नगर्न सुझाए । उनले परिणाम जेसुकै भएपनि हारमा दुःख र जीतमा दम्भ नलिएर खेलमा निरन्तर अग्रसरता देखाउन सुझाए । एकले हार्ने र अर्काेले जित्ने खेलको नियम भएको बताउँदै उनले खेलकूदको विकासका लागि महानगर सदैव तत्पर रहेको बताए । उनले आफूले प्राथमिकतामा राखेका कामहरूलाई अग्रता दिंदै आएको दाबी पनि गरे ।
वडाध्यक्ष सुशीलसाह कानूले आफ्नो कार्यकालमा यो प्रतियोगितालाई निरन्तरता प्रदान गर्ने बताए । उनले आफ्नो वडामा रहेको ठाराब क्याम्पसको खेलमैदानलाई नगरस्तरीय योजनामा पारेर मर्मतसम्भार गर्न नगरप्रमुखसँग आग्रह गरे । उनले सो मैदानमा वडास्तरबाट ब्याडमिन्टन र बास्केटबलको कोर्ट निर्माण गर्ने प्रतिबद्धता पनि जाहेर गरे ।
