प्रस, वीरगंज, १२ फागुन/
अलाइभ युथ सोसाइटीद्वारा आयोजित अन्तरछात्रा विद्यालयस्तरीय ब्याटमिन्टन प्रतियोगिताको उपाधि गौतम माविले जितेको छ । शनिवार दिल्ली पब्लिक स्कूललाई पराजित गर्दै गौतम माविले उपाधि जितेको हो । बिहीवारदेखि सञ्चालित प्रतियोगितामा ११ वटा टीम सहभागी थिए भने आज फाइनल खेल भएको थियो ।
समापन समारोहका प्रमुख अतिथि राजेशमान सिंहले विजयी र उपविजयी छात्राहरूलाई शिल्ड, मेडल, प्रमाणपत्र वितरण गरे । उनले युवाहरू नै देशका मेरुदण्ड भएका र उनीहरूबाटै विकास सम्भव हुने बताए । उनले खेलप्रति उत्साह जागृत भइरहेको र महानगरबाट पनि राष्ट्रिय–अन्तर्राष्ट्रिय स्तरका खेलाडीहरू तयार भइरहेकोमा खुशी व्यक्त गरे । कार्यक्रमको सहजीकरण मान्सी नेपालीले गरेकी थिइन् ।
