बलिराम शुक्ला, बिरुवागुठी १२ पुस/
पर्साको पर्सागढी नगरपालिका–७ स्थित छटघाट नदी किनारमा अलगअलग स्थानमा लुकाइछिपाई राखेको अवस्थामा तीन ट्याक्टर अवैध काँचो चिरपट दाउरा प्रहरी र वनगस्ती टोलीले आज बरामद गरेको छ ।
इलाका प्रहरी कार्यालय, पटेर्वासुगौली का प्रहरी निरीक्षक रामराजा केसरीको विशेष सूचनाको आधारमा इलाका प्रहरी कार्यालय एकटाङ्गा, बिन्दवासिनी कोइलाभार बडनिहार साझेदारी वन समितिका अध्यक्ष महमद रिजवानुल हक र सब डिभिजन वन कार्यालय रङ्गपुरका रेन्जरको नेतृत्वमा गएको प्रहरी र वन गश्तीको संयुक्त टोलीले दुर्ई स्थानमा अलगअलग लुकाइराखेको चिरपट दाउरा बरामद गरेको इलाका प्रहरी कार्यालय पटेर्वासुगौलीका प्रहरी निरीक्षक रामराजा केसरीले बताएका छन् ।
बरामद दाउरा कसको हो र कुन प्रयोजनको लागि लुकाइछिपाई राखेको हो खोजतलास भइरहेको र दाउरा आवश्यक कारबाईका लागि सब डिभिजन वन कार्यालय बडनिहारमा राखिएको बिन्दवासिनी कोइलाभार बडनिहार साझेदारी वन समितिका अध्यक्ष महमद रिजवानुल हकले बताएका छन् ।
