प्रस, परवानीपुर, ६ पुस/
वीरगंजमा जारी सिजी एजुकेशन कपमा शुक्रवार दुईवटा खेल सम्पन्न भए । दिल्ली पब्लिक स्कूलद्वारा पुस ४ गतेदेखि आयोजित नवौं संस्करणको प्रतियोगिता अन्तर्गत आज न्यू एकता स्कूल, सिमरा र लिटल फ्लावरबीच भएको पहिलो खेलमा न्यू एकताले लिटल फ्लावरलाई शून्य गोलका विरुद्ध चार गोलले पराजित गरेको छ ।
न्यू एकताको तर्फबाट केशव श्रेष्ठले २५, ४३ र ५२औं मिनेटमा तीन गोल गर्दै ह्याट्रिक गरे भने न्यू एकताका अर्का खेलाडी सन्तोष मगरले ४०औं मिनेटमा एक गोल गरेका थिए । खेल अवधिभर लिटल फ्लावरका खेलाडी निरीह देखिएका थिए । पटकपटक प्रयास गरे तापनि लिटल फ्लावरले गोल भने गर्न सकेन । सो खेलमा उत्कृष्ट खेलाडी न्यू एकताका ह्याट्रिक गर्ने केशव श्रेष्ठ घोषित भए ।
त्यस्तै, आजको दोसो खेलमा वीरगंजको साउथजोन स्कूललाई एक गोलका विरुद्ध दुई गोल गर्दै सिमरा पब्लिक स्कूल विजयी भएको छ । सिमराको तर्फबाट प्रिंयाश दास थारूले ३१औं र समीर रोयले ४९औं मिनेटमा दुई गोल गर्दा साउथजोनको तर्फबाट ५९औं मिनेटमा एक गोल फर्काउन सफल भयो । साउथजोनको तर्फबाट आदित्य चौधरीले सान्त्वना एक गोल गरेका थिए । यस खेलको उत्कृष्ट खेलाडी सिमरा पब्लिक स्कूलका विवेक चौधरी घोषित भए । शनिवार पहिलो खेल लोट्स एकेडेमी, वीरगंज र मोर्डन स्कूल, परवानीपुरबीच हुनेछ भने दोस्रो खेल सिमराको शुभतारा स्कूल र सोलिडारिटी स्कूलबीच हुने आयोजक डिपिएसका प्रधानाध्यापक रञ्जीव आनन्दले जानकारी गराए ।
