इस्लामाबाद, ६ पुस/एएफपी
पाकिस्तानका पूर्वप्रधानमन्त्री इमरान खानलाई राज्यका गोप्य कुराहरू चुहावट गरेको आरोपमा शुक्रवार जमानत दिइएको वकीलहरूले बताएका छन् । यद्यपि अन्य आरोपमा उनी कारागारमैं रहने भएका छन् ।
अगस्तमा हिरासतमा लिइएका खानले शक्तिशाली सेनामाथि उनको लोकप्रिय आन्दोलनलाई दबाउन र आगामी फेब्रुअरीमा हुने निर्वाचनमा उम्मेदवारी दिनबाट रोक्न लामो समयदेखि पाकिस्तानमा प्रभुत्व स्थापित गरेका वंशवादी पार्टीहरूसँग मिलेर काम गरिरहेको आरोप लगाएका छन् ।
सन् २०२२ अप्रिलमा शीर्ष अधिकारीहरूसँगको मनमुटावपछि सत्ताबाट बाहिरिएका ७१ वर्षीय खान कानूनी मुद्दाहरूको झमेलामा परेका छन् र दुईपटक कारागार गइसकेका छन् ।
वकील सलमान सफदरले खानका पूर्वविदेशमन्त्रीको नाम लिंदै अदालतबाहिर पत्रकारहरूसँग भने, “मुद्दा पूर्णरूपमा समाप्त भएको छ, इमरान खान र शाह महमुद कुरेशीलाई अन्ततः जमानत दिइएको छ ।” अभियोजकहरूले खान र कुरेशीमाथि अमेरिकामा पाकिस्तानका राजदूतले पठाएको कूटनीतिक तारलाई गलत प्रयोग गरेको आरोप लगाएका छन् । कानूनी चुनौतीले अदालतलाई उपस्थित पर्यवेक्षकहरूसँग कारबाही पुनः शुरू गर्न बाध्य नतुल्याउन्जेल कथित आरोपका लागि मुद्दा कारागारभित्र भएको थियो र ट्रायल गोप्यरूपमा भएको थियो ।
पूर्वप्रधानमन्त्री खानको तहरिक–ए–इन्साफ (पिटिआई) पार्टीले खान भ्रष्टाचारका विभिन्न मुद्दामा कारागारमा रहेका र फेब्रुअरी ८ मा हुने निर्वाचनमा उम्मेदवारी दिन कारागारबाट बाहिर निस्कने सम्भावना अत्यन्त कम रहेको बताएको छ । “निकट भविष्यमा उहाँले राहत पाउने सम्भावना अत्यन्त कमजोर देखिन्छ,” पार्टीका वकील खालिद युसुफ चौधरीले भने ।
पाकिस्तानमा राजनीतिज्ञहरूको भाग्य ऐतिहासिकरूपमा सैन्य प्रतिष्ठानसँग उनीहरूको सम्बन्धमा निर्भर गर्छ । पाकिस्तानी सेनाले धेरै अवसरमा मुलुकमा प्रत्यक्ष शासन गरेको छ । अत्यन्त लोकप्रिय खान सेनाको समर्थनमा सन् २०१८ मा सत्तामा आएका तर संसदीय अविश्वास मतबाट अपदस्थ भएपछि उनले सैनिक जनरलहरूले वाशिङ्टनसँग मिलेर उनको कार्यकाल समाप्त गर्ने षड्यन्त्र रचेको दाबी गरेका छन् । उनले सार्वजनिकरूपमा कूटनीतिक दस्तावेजहरूलाई आफ्नो दाबीका लागि आवश्यक प्रमाणका रूपमा प्रचार गरे । उनका वकीलहरूका अनुसार गोप्य सूचना चुहाएको अभियोगमा उनलाई १४ वर्षसम्मको कारागार सजाय वा मृत्युदण्ड पनि हुन सक्छ । रासस
