प्रस, वीरगंज, ४ जेठ/
पर्सामा औलो (मलेरिया) रोग नियन्त्रणसम्बन्धी सरोकारवालाहरूको बैठक सम्पन्न भएको छ । स्वास्थ्य कार्यालय, पर्साको आयोजनामा सम्पन्न बैठकमा सरोकारवालाहरूले सन् २०२५ सम्म राष्ट्रिय लक्ष्यअनुरूप औलो नियन्त्रणका लागि आआफ्नोस्तरबाट पहल गर्ने भनी प्रतिबद्धता जनाएका थिए ।
नेपालको तथ्याङ्क अनुसार चालू आवमा ३८ वटा स्थानीय र ४५३ वटा आयातित बिरामी फेला परेका छन् । पछिल्लो दुई आर्थिक वर्षमा औलोको सङ्ख्या घट्ने क्रममा थियो तर अहिले वृद्धि भएपछि नेपाल सरकार तथा स्वास्थ्य निकाय चिन्तित भएको छ । आव २०७६/७७ मा स्थानीय १०२, आयातित ५१७ बिरामी थिए भने २०७५/७६ मा स्थानीय ४४०, आयातित बिरामीको सङ्ख्या ६२५ थियो ।
त्यसैगरी, २०७४/७५ मा स्थानीय ५५७, आयातित बिरामी ६३० र २०७३/७४ मा स्थानीय ४९२ र आयातित बिरामी ६३६ बिरामी थिए । त्यसैगरी, चालू आवमा प्रदेशस्तरीय तथ्याङ्क हेर्ने हो भने कोशीमा १३, मधेसमा ४४, वाग्मतीमा २९, गण्डकीमा २०, लुम्बिनीमा १४२, सुदूरपश्चिममा १०५ कुल ४९१ बिरामी फेला परेको तथ्याङ्क जानकारी गराइएको थियो ।
मधेस प्रदेशका ४४ वटा बिरामीमध्ये पर्सा, बारामा एक/एक, रौतहटमा तीन, सर्लाहीमा २३, महोत्तरीमा तीन, धनुषामा १०, सिराहामा दुई, सप्तरीमा एकजना बिरामी फेला परेका छन् ।
औलो रोगका बिरामीलाई लामखुट्टेले टोकेपछि औलो रोगको परजीवी रगत चुसेसँगै उक्त लामखुट्टे पनि सङ्क्रमित हुन्छ र त्यही सङ्क्रमित पोथी लामखुट्टेले अन्य मानिसलाई टोक्दा औलो रोगको सङ्क्रमण हुने गरेको प्रशिक्षक डा उदयनारायण सिंहले जानकारी गराए ।
नारायणी अस्पतालका फिजिशियन डा सिंहले वरिपरि सरसफाइ र लामखुट्टेको टोकाइबाट बच्ने उपाय अपनाउँदा यो रोगबाट बच्न सकिने सुझाव दिए ।
वीरगंज महानगरपालिकाका सरसफाइ प्रमुख सर्फुद्दीन मियाँले लामखुट्टेको जीवनचक्र २१ दिनको हुने भएकोले महानगरले मात्र सरसफाइ गरेर हुँदैन, सबै समुदाय मिलेर आआफ्नो वरपर पानी जम्ने ठाउँको पहिचान गरी लामखुट्टेको वासस्थान र उत्पत्तिस्थानलाई सफा गर्नुपर्ने सुझाव दिए ।
नेपाल पत्रकार महासङ्घ, पर्साका अध्यक्ष अनुप तिवारीले लामखुट्टेको रोगबाट औलो र डेंगुजस्ता प्राणघातक रोग लाग्ने भएकोले परिवारका हरेक सदस्य सचेत भई दैनिक व्यवहारमा अपनाउनुपर्ने बताए ।
सामुदायिक प्रहरी सेवा केन्द्र, छपकैयाका अध्यक्ष ग्यासुद्दीन मियाँ ठकुराईले यो रोग निर्मूल गर्नको लागि हरेक समुदायले अग्रसरता देखाउनुपर्ने बताए ।
स्वास्थ्य कार्यालय, पर्साका प्रमुख नवलकिशोर साहको अध्यक्षता एवं स्वास्थ्य अधिकृत जयमोद ठाकुरको सहजीकरणमा भएको कार्यक्रममा पर्साका सञ्चारकर्मी, स्वास्थ्यकर्मी, सुरक्ष्Fाकर्मी, एनजिओ फेडरेशनका प्रतिनिधिलगायतको सहभागिता थियो ।
