प्रस, वीरगंज ३ फागुन/
स्थानीय युवाको अराजक गतिविधिको कारण जगरनाथपुर गाउँपालिका–३ स्थित बाबा वैद्यनाथ आधारभूत विद्यालय गढैयामा बुधवार अध्ययन प्रभावित भएको छ ।
स्थानीय युवाले विद्यालयका बालबालिका तथा शिक्षक–कर्मचारीलाई दुव्र्यवहार गरेपछि अध्यापन प्रभावित भएको विद्यालय प्रशासनले जनाएको छ ।
मङ्गलवार बिहान १०ः१० बजे विद्यालयको नियमित क्रियाकलाप अन्तर्गत प्रार्थना र पिटी खेलाउने समयमा स्थानीय युवाले पिटी खेल्न नदिएपछि विवाद भएको थियो । विवादपछि युवाहरूले कक्षाकोठामा बसेका विद्यार्थीहरूलाई बाहिर निकाल्ने, छात्राहरूको भिडियो बनाउनुको साथै किताब–कापी बाहिर फालेका विद्यार्थीहरूले बताएका छन् । युवाहरूले छात्राहरूमाथि हात हाल्ने, फलामको रड तेस्र्याउने र शिक्षक तथा विद्यार्थीहरूलाई अपशब्द प्रयोग गर्दै गालीगलौज गरेको एकजना विद्यार्थीले बताए ।
प्रधानाध्यापक बादशाह साहले विद्यार्थी, शिक्षक–कर्मचारीहरूको सुरक्षा व्यवस्था तथा न्यायका लागि वडा कार्यालय तथा जगरनाथपुर गाउँपालिकामा उजूरी दर्ता गरेका छन् । प्रअ साहले अराजक गतिविधि कार्यमा संलग्न सातजना युवक रहेको बताए ।
यसका साथै सो विद्यालयमा रहेका पाँचजना शिक्षकहरूको सरुवा माग गर्दै वडा कार्यालय र गापाको कार्यालयमा अर्काे निवेदन दर्ता गरिएको प्रअ साहले बताए ।
बाल विकासदेखि कक्षा ६ सम्म अध्ययन हुने सो विद्यालयमा आज केही अभिभावकहरू आई विद्यालय प्रशासनसँग सल्लाह गरी दिउँसो २ः३० बिदा दिइएको थियो ।
