प्रस, जनकपुरधाम, २९ मङ्सिर/
भारतीय प्रशिक्षक उमेश पटवाल नेपाल टी–२० लिगमा जनकपुर रोयल्सको मुख्य प्रशिक्षक नियुक्त भएका छन्। नेपाली राष्ट्रिय क्रिकेट टिमका प्रशिक्षक रहिसकेका पटवाललाई नियुक्त गरेको कुरा जनकपुर रोयल्सले बिहीवार सञ्चारकर्मीलाई जानकारी गराएको हो।
पटवालले भारत, अफगानिस्तान, युएईमा समेत काम गरिसकेका छन्। उनी २०७६ सालमा करीब आठ महीना नेपालको मुख्य प्रशिक्षक थिए। त्यस्तै, एभरेस्ट प्रिमियर लिगमा पोखरा राइनोजको प्रशिक्षक रहेका उनले पोखरा प्रिमियर लिगमा पनि काम गरेका थिए।
राष्ट्रिय टीमका फास्ट बलर सोमपाल कामी मार्की प्लेअर रहेको जनकपुर टीममा सन्दीप जोरा, आदिल आलम, दिलीप नाथ, ललित राजवंशी, सुशन भारी, सागर पुन, पवन सर्राफ, जीतेन्द्र मुखिया, राजेश पुलामी, खड्ग बोहरा जस्ता खेलाडी छन्। नेपाल टी–२० लिग यही डिसेम्बर २३ देखि शुरू हुने तालिका छ। जनकपुरले पहिलो खेल डिसेम्बर २४ मा पोखरा एभेन्जर्ससँग खेल्ने तय भएको छ।
