प्रस, वीरगंज, १५ असोज/
वीरगंजमा आजदेखि क्रिकेटका पूर्व खेलाडीहरूको प्रतियोगिताको रूपमा वीरगंज अल टाइम लेजेन्ड्स क्रिकेट कप आयोजना भएको छ । नारायणी रङ्गशालामा आयोजना भएको प्रतियोगिताको उद्घाटन वीरगंजका मेयर राजेशमान सिंहले गरेका थिए । क्रिकेट एसोसिएशन अफ पर्सा (क्यान) ले शनिवार र आइतवार आयोजना हुने प्रतियोगितामा वीरगंजका पूर्व खेलाडीहरूको चारवटा टिम रहेको छ ।
वीरगंज भेट्रान्स, वीरगंज लेजेन्ड्स, वीरगंज अल स्टार्स, वीरगंज हीरोज गीर चारवटा टिम प्रतियोगितामा सहभागी हुनेछ ।
प्रतियोगिताको प्रथम दिन शनिवार दुईवटा खेल सम्पन्न भएको छ ।
वीरगंज अल स्टार्स र वीरगंज भेट्रान्सबीच भएको पहिलो खेलमा वीरगंज अल स्टार्स विजयी भएको थियो भने वीरगंज हीरोज र वीरगंज लेजेन्डबीच भएको दोस्रो खेलमा वीरगंज हीरोज विजयी भएको छ ।
आइतवार वीरगंज हीरोज र वीरगंज अल स्टार एवं वीरगंज भेट्रान्स र वीरगंज लेजेन्डबीच थप दुईवटा खेल हुने कार्यतालिका रहेको छ । दुई दिनको चारवटा खेलमा बढी अङ्क ल्याउने दुईवटा टिम आइतवार साँझ फाइनल खेल्नेछन् । प्रतियोगिताको विजेता र उपविजेताले शील्ड तथा ट्राफी र मेडलहरू प्राप्त गर्ने आयोजक क्यान पर्साका अध्यक्ष्F दाउद अन्सारीले बताए ।
क्रिकेटप्रति वीरगंजमा रुचि बढाउन र पूर्व खेलाडीहरूलाई क्रिकेटसँग जोडिराख्न यो प्रतियोगिता आयोजना गरेको क्यान पर्साका प्रशिक्षक मुर्तजा हवारीले बताए ।
