जनकपुर, १६ असार/रासस
मधेस आन्दोलन र जनयुद्धका क्रममा शहीद हुनेको परिवारलाई भरणपोषणबापत मधेस प्रदेश सरकारले आर्थिक सहयोग प्रदान गर्ने भएको छ ।
शहीद परिवारको भरणपोषणबापत प्रदेशको गृह तथा सञ्चार मन्त्रालयले मधेसी शहीद प्रतिष्ठानमार्फत शहीद परिवारलाई मासिक रु १२ हजार आर्थिक सहयोग प्रदान गर्न लागेको हो ।
यस्तै शहीद परिवारका छोराछोरीलाई निश्शुल्क पठनपाठनका लागि छात्रवृत्तिसमेत दिन लागिएको मन्त्रालयका सचिव रामकुमार महतोले जानकारी दिए ।
“शहीद परिवारको भरणपोषण तथा छात्रवृत्तिका लागि आवेदन दिन हामीले सूचना जारी गरेका छौं”–उनले भने–“यसका लागि प्रदेश सरकारले यस वर्ष रु एक करोड विनियोजन गरेको छ, अब कतिको सङ्ख्यामा आवेदन आउँछ त्यही हिसाबले हामी रकम वितरण गर्छौं । कार्यविधिमा रु २१ हजारसम्म दिने भनिएको छ, निवेदन कतिको सङ्ख्यामा आउँछ त्यही अनुसार रकम घटबढ पनि हुन सक्छ ।”
शहीद परिवारका छोराछोरीलाई कक्षा १ देखि ६ सम्म रु १६ हजार र कक्षा ७ देखि १२ सम्मलाई रु १८ हजार एकमुस्ट वार्षिक छात्रवृत्ति दिन लागिएको सचिव महतोले बताए । प्रदेश सरकारको भरणपोषण तथा छात्रवृत्तिसम्बन्धी कार्यविधि २०७९ को दफा (६) बमोजिम मधेस आन्दोलन तथा जनयुद्धमा शहीद भएका परिवारमध्ये आर्थिक अवस्था कमजोर भएको परिवारलाई पहिलो प्राथमिकतामा राखी भरणपोषणबापत आर्थिक सहयोग उपलब्ध गराउने निर्णय भएको मन्त्रालयले जनाएको छ ।
