प्रस, वीरगंज, २९ वैशाख/
वीरगंज महानगर–१५ लक्ष्मणवामा एकजना युवकको शव शङ्कास्पद अवस्थामा फेला परेको छ। प्रतिमाचोकनिर स्थानीय मदिरापसलको बाहिरपट्टिको छानोको पाइपमा पासो लगाएर झुन्डिएको अवस्थामा सोही वडाका ४० वर्षीय सन्देश पटेल मृत फेला परेका हुन्।
प्रहरीको प्रारम्भिक अनुसन्धानमा पटेलको मृत्यु शङ्कास्पद देखाएको छ। पासो लगाएको अवस्थामा पटेल मृत फेला परे पनि मृतकको खुट्टा भुइँमा टेकिएको अवस्थामा रहेकोले हत्या गरी झुन्ड्याइएको हुन सक्ने आशङ्का गरिएको छ। प्रहरीले शल्यपरीक्षणपछि तथ्य कुरा बाहिर आउने बताएको छ।
बिहान साढे सात बजे पटेल सो ठाउँमा झुन्डिएको अवस्थामा फेला परेपछि स्थानीयले प्रहरीमा खबर गरेका थिए।
