प्रस, सेढवा, २५ असोज/
विजयबस्ती फूटबल क्लबद्वारा आयोजित समाजसेवी स्व रामबहादुर श्रेष्ठ दोस्रो गोल्डकप फूटबल प्रतियोगिता अन्तर्गत सोमवार भएको सेमिफाइनल खेलमा टाइबे्रकरबाट निर्मल युवा समाज विजयी भएको हो ।
मध्यान्तरपछि वनशक्ति युवा क्लब ठोरी–२ लाई टाइब्रेकरमा पराजित गर्दै निर्मल समाज फाइनलमा प्रवेश गरेको छ । खेलको निर्धारित समयमा कुनै टीमले गोल गर्न नसकेपछि खेल टाइब्रेकरबाट निर्णय गरिएको हो ।
अत्यन्त प्रतिस्पर्धात्मक खेलमा राष्ट्रिय तथा अन्तर्राष्ट्रिय खेलाडीहरू सहभागी थिए ।
खेलमा निर्मल युवा समाजका गोलकीपर अनिष देउला ‘म्यान अफ दी म्याच’ घोषणा भए । देउलालाई संविधानसभा सदस्य जयप्रकाश थारूले दुई हजार रुपैयाँको चेकसहित ट्रफी प्रदान गरे । भोलिको दोस्रो सेमिफाइनल खेल वीरगंज युनाइटेड र सुवर्ण युवा क्लब ठोरी–५ सुवर्णपुरबीच हुने आयोजकले जनाएको छ ।
