माधव तिमिल्सिना, ठोरी, २२ असोज/
ठोरी गाउँपालिका–४ मा जारी समाजसेवी स्व रामबहादुर श्रेष्ठ दोस्रो गोल्डकप फूटबल प्रतियोगिताको सेमिफाइनल समीकरण शुक्रवार पूरा भएको छ । शुक्रवार सम्पन्न क्वाटरफाइनलको अन्तिम खेलमा सुवर्ण युवा क्लब ठोरी–५ विजयी भयो । टाइब्रेकरमा भरतपुर फूटबल क्लब, चितवनलाई पराजित गर्दै सुवर्ण युवा क्लब ठोरी–५ सेमिफाइनलमा पुग्न सफल भएको हो ।
निर्धारित समयमा गोलरहित बराबरीमा खेल टुङ्गिएपछि टाइबे्रकरबाट निर्णय भएको थियो । सुवर्ण युवा क्लबले भरतपुरलाई एकका विरुद्ध तीन गोलअन्तरले पराजित गर्दै सुवर्ण युवा क्लब ठोरी–५ विजयी भएको हो ।
आजको खेलमा सुवर्ण युवा क्लबका अशोक बराल ‘म्यान अफ दी म्याच’ घोषित भए ।
यसैबीच, विजयबस्ती खेलमैदानमा असोज २५ गतेदेखि शुरू हुने सेमिफाइनल चरणको खेलमा पर्साका चारवटा टीमले फाइनल प्रवेशका लागि भिडन्त गर्ने आयोजकले जनाएको छ ।
सेमिफाइनलको पहिलो दिन असोज २५ गते निर्मल समाज युवा क्लब, ठोरी–४ र वनशक्ति क्लब ठोरी–२ का बीच फाइनल प्रवेशका लागि भिडन्त हुनेछ भने दोस्रो दिन २६ गते वीरगंज युनाइटेड र सुवर्ण युवा क्लब ठोरी–५ बीच प्रतिस्पर्धा हुनेछ ।
