माधव तिमिल्सिना, ठोरी, २० असोज/
ठोरी गाउँपालिका–४ विजयबस्तीमा जारी स्व रामबहादुर श्रेष्ठ दोस्रो गोल्डकप फूटबल प्रतियोगिताको दोस्रो दिनको क्वाटरफाइनल खेलमा वीरगंज युनाइटेड क्लब विजयी भएर सेमिफाइनलमा प्रवेश गरेको छ ।
आजको दोस्रो क्वाटरफाइनल खेलमा महावीर स्पोट्र्स क्लब, गम्हरियालाई शून्यका विरुद्ध चार गोलको फराकिलो अन्तरले पराजित गर्दै वीरगंज युनाइटेड सेमिफाइनलमा प्रवेश गरेको हो ।
वीरगंजको तर्फबाट कृपाकान्त चौधरीले एक्लैले चार गोल गरे । चौधरीले मध्यान्तरअघि तीन र मध्यान्तरपछि एक गोल गरेका थिए ।
चार गोल गरेका चौधरी नै आज ‘म्यान अफ दी म्याच’ घोषित भए ।
भोलि एफसी युनाइटेड सिमरा र निर्मल समाज युवा क्लब, ठोरी–४ तेस्रो क्वाटरफाइनल खेलमा भिड्ने आयोजक टीमले बताएको छ ।
