प्रस, ठोरी, १० भदौ/
अमृत युवा क्लब ठोरी–२ ले आयोजना गरेको नकआउट फूटबल प्रतियोगिता अन्तर्गत बिहीवार सम्पन्न पहिलो सेमिफाइनलमा वनशक्ति स्पोट्र्स क्लब विजयी भएर फाइनलमा प्रवेश गरेको छ।
सुन्दरबस्तीस्थित कृष्ण मन्दिर खेलमैदानमा निर्मल समाज क्लब मिलचोकलाई शून्यका विरुद्ध दुई गोलले पराजित गर्दै वनशक्ति स्पोट्र्स क्लब फाइनलमा प्रवेश गरेको हो। आजको खेलमा वनशक्तिका मन्दीप लामा र रूपेश लामाले एक/एक गोल गरेका थिए। वनशक्तिले लगातार दोस्रो गोल गरेपछि निर्मल समाजका खेलाडीहरू मैदान छाडी बाहिरिएका थिए। उनीहरू थप खेलका लागि मैदानमा प्रवेश नगरेपछि रेफ्रीले वनशक्ति स्पोट्र्स क्लबलाई विजयी घोषित गरेका थिए। आजको खेलको ‘म्यान अफ दि म्याच’ पहिलो गोलकर्ता मन्दीप लामा घोषित भए। दोस्रो सेमिफाइनल खेल शनिवार हुने आयोजक संस्थाका अध्यक्ष यादवराज कुँवरले बताए। प्रतियोगिताको फाइनल खेल श्रीकृष्ण जन्माष्टमीका दिन भदौ १४ गते सोमवार हुनेछ।
