नयाँ दिल्ली/
भारतका कोरोना भाइरसबाट नयाँ ४४ हजार ६४३ जना सङ्क्रमित थपिएका छन् ।
सरकारी अधिकारीले दिएको जानकारी अनुसार थपिएका सङ्क्रमितसँगै भारतमा अहिले सङ्क्रमित अवस्थामैं रहेको सङ्ख्या चार लाख १४ हजार १५९ पुगेको छ । यो सङ्ख्या कुल सङ्क्रमितको १.३० प्रतिशत भएको पनि जनाइएको छ ।
केन्द्रीय स्वास्थ्य मन्त्रालयका अनुसार पछिल्लो २४ घण्टामा भारतमा ४१ हजार ९६ जना कोरोना भाइरसबाट सङ्क्रमणमुक्त भएका छन् । एउटै समयमा कोरोना भाइरसबाट सङ्क्रमणमुक्त भएको सङ्ख्याभन्दा थप सङ्क्रमितको सङ्ख्या धेरै भएकाले अहिले सङ्क्रमित अवस्थामैं रहेकाको सङ्ख्यामा वृद्धि भएको छ ।
भारतमा अहिले सङ्क्रमणमुक्त भएको कुल सङ्ख्या तीन करोड १० लाख १५ हजार ८४४ पुगेको मन्त्रालयले जनाएको छ । कुल सङ्क्रमितमध्ये अहिलेसम्म सङ्क्रमणमुक्त भएको कुल सङ्ख्या ९७.३६ प्रतिशत पुगेको मन्त्रालयका अधिकारीहरूले जानकारी दिएका छन् । भारतमा कोरोना भाइरसबाट सङ्क्रमित भएर अहिलेसम्म चार लाख २६ हजार ७५४ जनाको मृत्यु भएको मन्त्रालयको तथ्याङ्क छ । तीमध्ये ४६४ जनाको पछिल्लो २४ घण्टामा मृत्यु भएको हो ।
अधिकारीहरूका अनुसार भारतमा अहिलेसम्म ४९ करोड ५३ लाख २७ हजार ५९५ भन्दा बढी मानिसलाई कोरोना भाइरसविरुद्धको खोप लगाइएको छ ।