प्रस, वीरगंज, १८ साउन/
सशस्त्र प्रहरीले २१ किलो गाँजासहित ट्रक बरामद गरेको छ ।
सशस्त्र प्रहरी बल नेपाल १३ नं गण हेडक्वार्टर पर्साका सशस्त्र प्रहरी निरीक्षक राजेश्वरप्रसाद साहको कमान्डमा खटेको टोलीले सोमवार बिहान साढे ७ बजे बेवारिसे अवस्थामा रहेको ट्रकबाट २१ किलो गाँजा बरामद गरेको हो ।
वीरगंज महानगर–१४ पिपरा दोस्रो बाइपासमा रोकिराखेको ना.३ख ४२९७ नम्बरको ट्रक चेकजाँच गर्दा ट्रकको केबिनबाट चार पोका गाँजा बरामद भएको थियो ।
बरामद गाँजा २१ किलो रहेको सशस्त्र प्रहरीले जनाएको छ । बरामद गाँजा र ट्रक कारबाईको लागि जिल्ला प्रहरी कार्यालय, पर्सामा पठाइएको सशस्त्र प्रहरी बल नेपाल १३ नं गणले जनाएको छ ।
