प्रस, निजगढ, १३ साउन/
निजगढमा अवैध गाँजासहित एक जनालाई बुधवार प्रहरीले पक्राउ गरेको छ । पक्राउ पर्नेमा निजगढ नपा–१२ रामथलीका ६२ वर्षीय शेरबहादुर जिम्वा रहेको इलाका प्रहरी कार्यालय, निजगढले जनाएको छ ।
निजगढ—रतनपुर सडकखण्डको बीच जङ्गल क्षेत्र हुँदै रामथलीबाट निजगढतर्फ पैदल हिंडेर आइरहेका रहँदा प्रहरीले शङ्का लागी पिठ्युको झोला चेकजाँच गर्दा ५ किलोग्राम गाँजा बरामद भएको प्रहरी निरीक्षक शङ्करप्रसाद चौधरीले जानकारी दिए ।
उनलाई इप्रका निजगढमा राखी थप अनुसन्धान भइरहेको छ । उक्त गाँजा बिक्रीका लागि लैजान लागेको प्रारम्भिक अनुसन्धानबाट खुलेको निजगढ प्रहरीले जनाएको छ ।
छिमेकी मकवानपुर जिल्लाको चुरे क्षेत्रको भोगटे, चिसापानी, गडवान, ज्यामिरेलगायत बस्तीमा ठूलो परिमाणमा गाँजा खेती हुँदै आएपनि प्रहरीले पूर्ण रूपमा नष्ट गर्न तत्परता नदेखाउँदा उत्पादित अवैध गाँजा लुकाइछिपाइ बारा, निजगढतर्फ बिक्रीका लागि ल्याउने गरेका छन् ।
