दमस्कस ७ साउन/सिन्हवा
बुधवार मध्यरातिदेखि इजरायली सेनाले सिरियामाथि मिसाइल हमला गरेको सिरियाबाट प्राप्त समाचारमा जनाइएको छ । सिरियाको मध्य शहर होम्समा इजरायली सेनाले हमला गरेको बताइएको छ ।
बुधवार मध्यरातिदेखि होम्स शहरमा इजरायलले मिसाइल हानेको उक्त समाचारमा जनाइएको छ । सिरियाको समाचार समिति सानाले सो समाचार दिएको छ । सानाका अनुसार गत मध्यरातदेखि सिरियामा सो हमला भएको हो । उक्त समाचार समितिले सो हमला इजरायली सेनाले गरेको पुष्टि भएको पनि बताएको छ ।
मध्य सिरियाली शहर होम्सको क्वासेर क्षेत्रमा हमला केन्द्रित रहेको पाइएको छ । उक्त क्षेत्रमा सिरियाली सेनाले पनि प्रतिरक्षा गरेर मिसाइल प्रहार गरेको छ । त्यसबाट भएको हताहतको समाचार भने आएको छैन । आक्रमणबाट के कति मानिस हताहत भए खोजी भइरहेको बताइएको छ । केही दिन यतादेखि इजरायलले सिरियामाथि हमला गरिरहेको छ । गत सोमवार पनि इजरायलले उत्तरी सिरियाली शहर अलेपोमा आक्रमण गरेको थियो ।
यस विषयमा सिरियाले कुनै प्रतिक्रिया दिएको छैन । सिरियामा अहिले पनि हिंसा जारी छ र विभिन्न हिंसात्मक समूहहरूका कारण नागरिकको ज्यान जाने क्रम जारी छ ।
