प्रस, पंचगावाँ, ३ साउन/
पर्साको पटेर्वासुगौली गाउँपालिका–४ भतौडास्थित वनदेवी आधारभूत विद्यालयमा बालविकासदेखि कक्षा ५ सम्मका छात्रछात्रालाई निश्शुल्क पाठ्यपुस्तक वितरण गरिएको छ ।
वितरण कार्यमा अभिभावक, शिक्षक र विद्यार्थीको सहभागिता थियो ।
असार २७ गतेदेखि वितरण कार्य शुरू गरेको र बीचमा मौसम प्रतिकूल भएको कारण छुट भएकाहरूलाई आइतवार पाठ्यपुस्तक वितरण गरिएको प्रधानाध्यापक सुभाषप्रसाद दास थारूले बताए ।
सो क्रममा विद्यालयका विषयगत शिक्षकहरूले पाठ्यपुस्तक वितरण गर्दै सबै विषय घरमा कसरी पढ्ने र पढ्ने क्रममा आइपर्ने अप्ठ्यारा शब्दलाई सहजीकरण गर्दै घरमा मन लगाएर पढ्न सुझाव दिएको शिक्षिका सुस्मिताकुमारी चौधरीले बताइन् ।
सो अवसरमा शिक्षक योगेन्द्र राउत थारूले इन्टरनेट सेवालगायत कम्प्युटर, मोबाइलको व्यवस्था भएको खण्डमा सिकाइ कार्य झनै सहज हुने बताए ।
