प्रस, वीरगंज, २० असार
नेपाली काङ्ग्रेसका पूर्वसभापति एवं पूर्वप्रधानमन्त्री स्व गिरिजाप्रसाद कोइरालाको ९७औं जन्यजयन्तीको अवसरमा गिरिजाप्रसाद कोइराला फाउन्डेशन, पर्साले आइतवार वृक्षारोपण गरेको छ ।
वीरगंजको आइसिपी र आदर्शनगरस्थित कब्रिस्तानमा २२५ वटा साल, सिसौं, बेल, सफेदा, खयर, औरा, टीक, अशोक लगायतका बिरुवा रोपिएको फाउन्डेशनका सदस्य दिलीपराज कार्कीले बताए । उनले फाउन्डेशनको आयोजनामा ९७औं जन्मजयन्ती २०, २१ र २२ गते गरी तीन दिन मनाउने कार्यक्रम तय भएको जानकारी गराए ।
सोमवार असार २१ गते रक्तदान र असार २२ गते मङ्गलवार वीरगंजका दुईजना क्रियाशील पत्रकारलाई जनही रु २५ हजारले पुरस्कृत गर्ने सदस्य कार्कीले बताए । फाउन्डेशनका अध्यक्ष महम्मद सहाबुद्दीनको अध्यक्षतामा आज भएको वृक्षारोपण कार्यक्रममा नेपाली काङ्ग्रेसका धु्रव नेपाल, दिना गुप्ता, श्याम पोखरेल, रामरूप कुर्मी, शिवओम लामिछाने, नवीन सिंहलगायतको सहभागिता थियो ।
