ब्रसेल्स, ९ असार/सिन्ह्वा
युरोपेली आयोगकी अध्यक्ष उर्सुला भोन लायनले युरोपेली आयोगमा आबद्ध तीन मुलुकको कोभिड–१९ आर्थिक पुनरुद्धार योजनालाई अनुमोदन गरेको बताएकी छन् ।
आयोगले कोभिड–१९ पश्चात् इटाली, जर्मनी र लातभियाको आर्थिक पुनरुद्धार योजनालाई स्वीकृत गरेको हो । आयोगकी अध्यक्ष लायनले तीनै मुलुकको भ्रमण पनि गरेकी छन् ।
इटालीमा लायनले इटालीका प्रधानमन्त्री मारियो ड्रागीसँग भेटवार्ता गरेकी थिइन् । प्रधानमन्त्री ड्रागीसँगको भेटपछि ट्वीट गर्दै लायनले इटालीका लागि ९० करोड अमेरिकी डलरको आर्थिक पुनरुद्धार योजना स्वीकृत गरेको बताएकी छन् ।
युरोपेली आयोगबाट सर्वाधिक ठूलो आर्थिक सहायता प्राप्त गर्नेमा इटाली रहेको छ । आयोगका अनुसार इटालीले अनुदानबापत ६८.९ अर्ब युरो र ऋणबापत १२२.६ अर्ब युरो प्राप्त गर्नेछ ।
यसैगरी, जर्मनीले स्वास्थ्य सेवा र सार्वजनिक प्रशासनको डिजिटलाइजेशनका लागि सहायता प्राप्त गर्नेछ । जर्मनीका चान्सलर एन्जेला मर्केलले जर्मनीले हाइड्रोजन, माइक्रोइलेक्ट्रोनिक्स, क्लाउड र डेटा प्रोसेसिड्ढा क्षेत्रमा लगानी बढाउने बताएकी छन् ।
आयोगकी अध्यक्ष लायनले लातभियाको आर्थिक पुनरुद्धार योजनाका बारेमा पनि घोषणा गरिन् । गत वर्ष, युरोपेली आयोगका नेताहरूले कोरोना भाइरस महामारीको आर्थिक तथा सामाजिक असरलाई सम्बोधन गर्न व्यापक आर्थिक पुनरुद्धार कोष स्थापना गर्न सहमति जनाएका थिए । रासस
