प्रस, ठोरी, ६ असार/
ठोरी गाउँपालिकाभित्रका सबै सामुदायिक विद्यालयहरूले आइतवार शैक्षिकसत्र २०७७ को परीक्षाफल प्रकाशन गरेका छन् । कक्षा शिशुदेखि कक्षा ९ सम्मको अन्तिम परीक्षाफल निष्कासन गरिएको हो तर कक्षा ८ को परीक्षाफल भने गाउँपालिकाले प्रकाशन गर्ने हुँदा अन्य कक्षाको नजीता प्रकाशित भएको छ ।
कोरोना महामारीका कारण निर्धारित मितिमा परीक्षा सञ्चालन गर्न नसकिए तापनि विद्यालयले लिएका अन्य परीक्षा, विद्यार्थीको अनुशासन, विद्यालय उपस्थितिलाई आधार मानी सम्पूर्ण विद्यालयले शैक्षिकसत्र २०७७ को अन्तिम परीक्षाफल प्रकाशित गरेको ठोरी गाउँपालिकाका शिक्षा संयोजक भुपालकुमार जोशीले जानकारी दिए ।
कक्षा ८ को परीक्षाफलको जिम्मेवारी पालिकाको रहेका कारण कक्षा ८ को पनि चाँडै परीक्षाफल प्रकाशन गरिने संयोजक जोशीले जानकारी दिए । अन्तिम परीक्षाफल प्रकाशन भएसँगै शैक्षिकसत्र २०७७ को अन्त्य भएको छ भने भोलिबाटै नयाँ शैक्षिकसत्रको भर्नासमेत शुरू भएको छ ।
