प्रस, बिरुवागुठी, १४ जेठ/
बिहीवार राति आएको हावाहुरीले जनता सडकमा रहेका चारवटा विद्युत् पोल ढालेपछि आवागमन प्रभावित भएको छ ।
निकै जोडले आएको हावाहुरीका कारण सडकछेउमा गाडिएका चारवटा पोल भाँच्चिएको हो ।
पर्सागढी नगरपालिका-३ बडनिहारस्थित पुनीत पुलनजीक रहेका चारवटा विद्युत् पोल भाँच्चिएपछि बेलुकीदेखि विद्युत् आपूर्ति बन्द भएको छ भने सो सडकखण्डमा सवारी आवागमन पनि रोकिएको थियो ।
नेपाल विद्युत् प्राधिकरण बिरुवागुठी फ्युज शाखाका प्रमुख विलेक्षणप्रसाद पञ्जियारले नयाँ पोल गाड्ने काम भइरहेको बताए । उनले निरन्तर वर्षाको कारण तत्काल विद्युत् आपूर्ति हुन नसक्ने र नयाँ पोल गाडेर तार मरम्मत गरी सेवा सुचारु गर्न कम्तीमा दुई दिन लाग्ने बताए । पोल र तारलाई सडकखण्डबाट हटाएर सवारी आवागमन भने सुचारु पारिएको छ ।
