प्रस, सर्लाही, १२ जेठ/
ब्रह्मपुरी गाउँपालिका–४ स्थित राजबेरी इलाकाबाट सशस्त्र प्रहरीको टोलीले लागूऔषधसहित एकजनालाई पक्राउ गरेको छ।
पक्राउ पर्नेमा बरहथवा नगरपालिका–५ बस्ने २१ वर्षीय प्रमोदकुमार महतो छन्। महतोको साथबाट सशस्त्र प्रहरीको टोलीले १२० बोतल लागूऔषध बरामद गरेको हो।
भारतबाट नेपालतर्फ आउँदै गरेका महतोलाई सशस्त्र प्रहरीको बोर्डर आउट पोस्ट त्रिभुवननगरबाट खटिएको टोलीले शङ्का लागेर चेकजाँच गरेको थियो। चेकजाँचको क्रममा लागूऔषध भेटिएपछि महतोलाई आवश्यक कारबाईको लागि नेपाल प्रहरीलाई बुझाइएको सशस्त्र प्रहरीले जनाएको छ।
