काठमाडौं, ९ जेठ/रासस
नयाँ भेरियन्टसहितको दोस्रो लहरको कोरोना तीव्ररूपमा फैलिएकोले रुघा, खोकी, ज्वरो, जीउ दुख्नेलगायत स्वास्थ्य समस्या हुँदा जाँच गराउन जोड दिइएको छ।
वाग्मती सफाइ महाअभियान र ‘हामी तपाईंको साथमा’ नामक परोपकारी अभियानले शनिवार बेलुका जुम प्रविधिबाट आयोजना गरेको ‘अहिलेको महामारीमा के गर्ने ? के नगर्ने ?’ विषयक छलफल कार्यक्रममा त्रिभुवन विश्वविद्यालय शिक्षण अस्पतालका डा सन्तकुमार दासले कोरोनाको दोस्रो चरणमा रुघा, ज्वरोमात्र आएकालाई पनि कोरोना पुष्टि भएकोले सजग हुन आह्वान गरे।
सामान्य स्वास्थ्य समस्या आउँदैमा कोभिड होइन, किन जाँच गर्ने भनेर नबसी स्वास्थ्य जाँच गरी ढुक्क हुनुपर्ने उनले बताए। ढिला अस्पताल पुग्ने बिरामीलाई बचाउन अप्ठ्यारो भएकाले स्वास्थ्यबारे सतर्क रहन दासले अनुरोध गरेका हुन्। सबै ज्वरोलाई कोभिड नै ठानेर परीक्षण गर्नुपर्ने सुझाव चिकित्सकको छ। छिटो परीक्षण गरे स्वास्थ्य सुरक्षाका विधि पालन गरी बिरामीलाई बचाउन सकिने चिकित्सकको अनुभव छ।
पहिलो चरणमा कोरोनाले युवालाई फरक पर्दैन भनी बेवास्ता गरेकोमा दोस्रो चरणमा धेरै युवालाई समातिरहेको छ। बालबालिका पनि प्रभावित हुन थालेका छन्। अझ तेस्रो चरणमा बालबालिकालाई धेरै असर गर्ने विज्ञको अनुमान सार्वजनिक भइरहेका बेला स्वास्थ्य सजगता
अँगाल्न स्वास्थ्यकर्मीहरूको भनाइ छ। बिरामी आफैंले औषधि किनेर खाने नगरी चिकित्सकको सल्लाहमा मात्र अघि बढ्नुपर्ने सुझाव दासले दिएका छन्।
जनसङ्ख्याको ७० प्रतिशतभन्दा बढी नागरिकलाई खोप नलगाएसम्म स्वास्थ्य मापदण्ड पालना गर्नुपर्ने उनको सुझाव छ। प्रशस्त सुत्न, यथेष्ट मात्रामा पानी पिउन पनि उनले सल्लाह दिएका छन्। छ दिनभन्दा बढी ज्वरो आए घरमा नबसी तत्काल चिकित्सककहाँ जान चिकित्सकले सुझाव दिएका छन्। दोस्रो लहर अझै १० दिनसम्म रहन सक्ने दासको भनाइ छ। दोस्रो चरणमा धेरैलाई निमोनिया भइरहेको छ।
कार्यक्रममा पूर्व मुख्यसचिव एवं सफाइ महाअभियानका मुख्य अभियानकर्मी लीलामणि पौडेल, अभियानकर्मी राजकुमार भट्टराईलगायतले आम मानिसमा चेतना जागृत गर्न जूम प्रविधिका माध्यमबाट साप्ताहिकरूपमा कार्यक्रम आयोजना गरिएको बताए। महाअभियानले प्रत्येक दिन बिहान साढे छ बजेदेखि एक घण्टासम्म कोरोनाबाट बच्न सहयोग पुग्ने प्राणायाम, योगासनलगायत साधना गराइरहेको छ।
