काठमाडौं, २८ वैशाख/रासस
काठमाडौंका विभिन्न क्षेत्रमा अनुगमनका क्रममा लुकाई–छिपाई अवैध रूमपा अक्सोमिटर बिक्री वितरण गर्ने सातजनालाई पक्राउ गरी कारबाई गरिएको छ।
जिल्ला प्रशासन कार्यालयका अनुसार बिल बिजक नभएको, निर्माण कम्पनीको नाम, ठेगाना र वारकोडसमेत नभएको, न्यून गुणस्तरको अक्सोमिटर बिक्री वितरण भइरहेको विशेष सूचनाका आधारमा अनुगमन गर्दा उनीहरूलाई पक्राउ गरिएको हो। अनुगमनमा काठमाडौं प्रशासनसँगै महानगरीय अपराध महाशाखा, औषधि व्यवस्था विभाग र वाणिज्य विभागको समेत सहभागिता थियो।
काठमाडौं प्रशासनले आज एक सूचना जारी गरी उनीहरूबाट ८६५ थान अक्सोमिटर बरामद गरेको र पक्राउ परेका सातैजनाविरुद्ध कानूनी कारबाई अघि बढाइएको जनाएको छ। पछिल्लो समयमा अत्याश्यक वस्तुको अभाव सिर्जना गर्ने, कालोबजारी गर्ने र बढी मूल्य लिएर सेवा दिने गतिविधि नियन्त्रणमा नियमित अनुगमन भइरहेको छ। सो क्रममा प्रहरीले बढी भाडा लिने व्यक्तिलाई पक्राउ गरी कारबाई गरिरहेको छ भने अक्सिजन सिलिन्डर सङ्कलन अभियानसमेत जारी छ। अस्पतालले समेत चर्काे शुल्क लिने गरेको गुनासो आएकोले अनुगमन भइरहेको प्रशासनले जनाएको छ।
