प्रस, रक्सौल, २१ चैत/
रक्सौलमा एकजना व्यापारीलाई धम्क्याएर रकम लिएको कसूरमा प्रहरीले तीनजनालाई पक्राउ गरेको छ।
एसपी नवीनचन्द्र झाले पत्रकार सम्मेलन गर्दै व्यापारीलाई धम्क्याएर २ लाख १० हजार लिएको सूचनाका आधारमा डिएसपी सागरकुमार झाको नेतृत्वमा टोली बनाएर अनुसन्धान अगाडि बढाएको र घटनामा संलग्न तीनजना युवकलाई हतियार र नगदसहित पक्राउ गरिएको बताए।
एसपी झाले दरपा थाना अन्तर्गतका एकजना व्यापारीलाई धम्क्याएर चैत १८ गते २ लाख १० हजार लुटेको उजूरी परेको र सो सम्बन्धमा अनुसन्धान गर्दा आदापुर भालुवहियाका विट्टुकुमार सिंह, प्रिंस कुमार र छोटु साहलाई पक्राउ गरिएको बताए।
पक्राउ परेकाहरूबाट लुटिएको रकममध्ये एक लाख ८० हजार बरामद भएको बताए। यसैगरी उनीहरूबाट कटुवा बन्दुक दुई थान र त्यसमा प्रयोग हुने गोली ५ थान बरामद भएको एसपी झाले पत्रकार सम्मेलनमा जानकारी गराए।
अनुसन्धानमा डिएसपी झा, अतिरिक्त दरपा थानाध्यक्ष
ज्वालाकुमार सिंह, आदापुर थानाध्यक्ष सन्दीप कुमार, प्राविधिक मनीष कुमार र कुमार चिरञ्जीवीको टोलीले आरोपीहरूलाई पक्राउ गरेको एसपी झाले बताए।
