प्रस, बिरुवागुठी, २७ फागुन/
सबडिभिजन वन कार्यालय बडनियारले काठसहित चारजनालाई पक्राउ गरेको छ।
बुधवार राति ८ बजे गस्तीको क्रममा चारवटा साइकलमा पाँच थान करीब १० क्यूफिट काठ लोड गरी ल्याउने क्रममा पर्सागढी नपा–२ गोडपसरा टोलबाट चारजनालाई पक्राउ गरिएको सबडिभिजन वन कार्यालय बडनियारका जमदार अर्जुन चौधरीले बताए।
पक्राउ पर्नेमा पर्सागढी नपा–५ का दुःखी राम, बजरी राय, गोकुल राय र वीरेन्द्र रायभर हुन्। उनीहरू ढुवानीकर्ता मात्र भएको बुझिन आएको छ।
पक्राउ परेका चारैजनालाई आवश्यक कारबाईको लागि डिभिजन वन कार्यालय पर्सा पठाइएको छ भने बरामद काठ र साइकल सबडिभिजन वन कार्यालय बडनियारमा राखिएको छ।
प्रस, पर्सागढी/
यसैगरी, सबैया सबडिभिजन वन कार्यालय र सबैया साझेदारी वन उपभोक्ता समितिको टोलीले ११ क्यूफिट गोलियासहित एकजनालाई पक्राउ गरेको छ। वीरगंज–३१ रामवननजीकबाट ११ क्यूफिट सालको गोलियासहित वीरगंज–२९ रतनपुर निवासी कासिम मियाँलाई पक्राउ गरिएको वन कार्यालयले जनाएको छ।
