प्रस, पंचगावाँ, १० फागुन/
पर्साको सखुवाप्रसौनी गाउँपालिका वडा नं १ वडा कार्यालय र सखुवाप्रसौनी गाउँपालिका कार्यालयद्वारा आयोजित तेस्रो गोल्डकप फूटबल प्रतियोगिता सोमवारबाट शुरू भएको छ। खेलको उद्घाटन पूर्वसांसद हरिनारायण रौनियारले गरेका थिए।
उद्घाटन खेल गढीमाई युथ एकेडेमी अपौनी पर्सा र बारा युथ–११ फूटबल टीमबीच भएकोमा बारा शून्यका विरूद्ध २ गोलअन्तरले विजयी भएको खेल व्यवस्थापन समितिका संयोजक भरत सहनीले बताए। उद्घाटन कार्यक्रमको सञ्चालन दीपेन्द्र कँडेलले गरेका थिए।
सो अवसरमा सखुवाप्रसौनी गाउँपालिकाका अध्यक्ष प्रदीप जैसवाल, प्रमुख प्रशासकीय अधिकृत सन्देशकुमार यादव, नेपाल राष्ट्रिय मावि सिरही सथवलका प्रधानाध्यापक भागवतप्रसाद थारू, सखुवाप्रसौनी गाउँपालिका सामाजिक विकास शाखा प्रमुख विनोद यादव, वडा नं १ का सचिव चन्द्रकिशोर पटेल, वडा नं ९ का अध्यक्ष रामनारायण गौरोलगायतको सहभागिता थियो। उद्घाटन कार्यक्रम वडा नं १ का अध्यक्ष विश्वनाथ पटवारीको सभापतित्वमा भएको थियो।
