प्रस, वीरगंज, १ फागुन/
समग्र नेपालद्वारा शनिवार बहुदरमाई नगरपालिका–२ पिपरामा सञ्चालित नगरस्तरीय क्रिकेट प्रतियोगिताको जसपाका केन्द्रीय सदस्य शिव पटेलले उद्घाटन गरेका छन्।
बहुदरमाई मन्दिरनजीक तिलावे नदीको किनारमा रहेको मैदानमा भएको उद्घाटन कार्यक्रममा नेता पटेलले खेल युवापीढीको लागि गहना भएको बताए। उनले खेलले युवाहरूलाई शारीरिकरूपमा स्वस्थ्य बनाउनुका साथै अनुशासनमा रहन, लगनशील हुन र युवाहरूको भविष्य निर्माणमा अहम् भूमिका निर्वाह गर्ने बताए।
प्रतियोगितामा नगरपालिकाका ८ वटा वडाका क्रिकेट क्लबहरू सहभागी छन्। प्रतियोगिताको आयोजना गरी उत्कृष्ट खेलाडीको चयन गरेर नगरस्तरीय टीम बनाउने उद्देश्य रहेको आयोजक संस्थाले जनाएको छ।
संस्थाका अध्यक्ष शुभराती अन्सारीको अध्यक्षतामा भएको उद्घाटन समारोहमा जसपा पर्साका सचिव श्रीराम गिरी, नगरअध्यक्ष कृष्ण यादव, वडाध्यक्ष जीतेन्द्र पटेल, स्थानीय समाजसेवी लक्ष्मी साहलगायतले शुभकामना व्यक्त गरेका थिए।
आज भएको उद्घाटन खेलमा गम्हरिया र विश्रामपुर छपकैया विजयी भएका छन्।
पहिलो खेलमा गम्हरियाले भौराटाँडलाई र दोस्रो खेलमा विश्रामपुर छपकैयाले नगरदाहालाई पराजित गरेका थिए।
