प्रस, निजगढ, १ फागुन/
निजगढमा नगरस्तरीय तेस्रो मेयर कप फूटबल प्रतियोगिता–२०७७ शनिवार उद्घाटन भयो।
निजगढका प्रमुख सुरेशकुमार खनाल र उपप्रमुख लीलादेवी लामिछानेले सो प्रतियोगिताको संयुक्तरूपमा उद्घाटन गरेका थिए।
कार्यक्रममा नगरप्रमुख खनालले निजगढमा फूटबल खेलको विकासका लागि नगरपालिकाले मेयर कप फूटबल प्रतियोगिताको सञ्चालन लगातार तीन वर्षदेखि गर्दै आएको बताए। उनले खेलाडी उत्पादन र फूटबल खेलको प्रवद्र्धनको लागि मेयर कप फूटबलले महत्वपूर्ण भूमिका निर्वाह गर्ने र ढिलै भएपनि यसको प्रतिफल आउनेमा आफू आशावादी रहेको उनले बताए। उपप्रमुख लीलादेवी लामिछानेले खेलले शरीर स्वस्थ हुनु त छँदैछ, यसले एकापसमा मैत्री, सद्भाव, मित्रता, भाइचारासमेत बढाउने भएकोले अन्य क्षेत्रको विकाससँगै खेलकूदको विकास हुनुपर्ने बताइन्। उनले समूहगतरूपमा खेलिने फूटबल सबै उमेर समूहले सहज, सरलरूपमा बुझ्ने भएकाले यसको महत्व विश्वमा बढ्दै गइरहेको पनि बताइन्।
कार्यक्रममा नेपाल तेक्वान्दो सङ्घ प्रदेश २ का संयोजक पेमासिद्धि लामाले फूटबल खेलको विकासको लागि नगरपालिकाले प्रशिक्षकसहित नियमित प्रशिक्षणको व्यवस्था मिलाउनुपर्नेमा जोड दिए।
कार्यक्रममा प्रतियोगिता आयोजक समितिका सचिव स्वर्ण लामाले स्वागत गरेका थिए। कार्यक्रमका अध्यक्षता निजगढ फूटबल क्लबका अध्यक्ष शम्भु थापाले गरेका थिए भने कार्यक्रमको सञ्चालन भाइकाजी श्रेष्ठले गरेका थिए।
निजगढ फूटबल क्लबको आयोजनामा शहीद हीरालाल रङ्गशालामा सञ्चालित नगरस्तरीय तेस्रो मेयर कप फूटबल प्रतियोगिताको उद्घाटन खेलमा निजगढ नगरपालिका वडा नं ५ को निजगढ सिटी क्लबले विजयी सुरुआत गरेको छ।
आजको खेल निजगढ नगरपालिका वडा नं ५ को निजगढ सिटी क्लब र पहिलो संस्करणको विजेता निजगढ नगरपालिका वडा नं ४ को निजगढ युवा क्लबबीच भएको थियो।
६० मिनेटको खेल अवधिभर दुवै टीमले गोल गर्न नसकेपछि टाइब्रेकरमा निजगढ सिटी क्लबका गोलरक्षकले रचित थापाले निजगढ युवा क्लबका कप्तान रञ्जीत धार्मीको प्रहार रोक्न सफल भएका थिए भने मङ्गल कुमारले प्रहार गरेको बल बाहिर गएको थियो। खेलको म्यान अफ दि म्याच निजगढ सिटी क्लबका गोलरक्षकले रचित थापालाई प्रदान गरिएको थियो।
भोलि दुई चरणमा खेल हुने आयोजक समितिले जनाएको छ। जसमा पहिले चरणको खेल समूह ‘ए’का सिंगौल एफसि ‘ए’ र शान्तिटोल युनाइटेडबीच अपराह्न १२ः३० मा र समूह ‘बी’का रतनपुर युनाइटेड युथ ‘ए’ र नमोबुद्घ आधुनिक क्लबबीच दिउँसो २ बजे हुने आयोजक क्लबका उपाध्यक्ष दिनेश श्रेष्ठले जानकारी दिए।
