प्रस, निजगढ, २९ माघ/
‘निजगढको शान, खेल प्रवद्र्धन तथा खेलाडी उत्पादन हाम्रो अभियान’ नाराका साथ नगरस्तरीय तेस्रो मेयर कप फूटबल प्रतियोगिता–२०७७ निजगढमा हुने बिहीवार पत्रकार सम्मेलन गरी जानकारी गराइएको छ।
फागुन १ देखि १४ गतेसम्म प्रतियोगिता सञ्चालन हुने आयोजक निजगढ फूटबल क्लबका अध्यक्ष शम्भु थापाले बताए। प्रतियोगिताको सम्पूर्ण तयारी भइसकेको उनले बताए। निजगढ नगरपालिकाको ८ लाख रुपैयाँको आर्थिक सहयोगमा आयोजना गरिने प्रतियोगितामा नगरका १६ टीम सहभागी हुने पत्रकार सम्मेलनमा जानकारी दिइएको थियो।
प्रतियोगिताका प्रथम विजेता टीमले १ लाख नगदसहित ट्रफी, मेडल, प्रमाणपत्र र उपविजेताले ४५ हजार नगदसहित ट्रफी, मेडल, प्रमाणपत्र प्राप्त गर्ने बताइएको छ। यसैगरी, प्रतियोगिता अवधिभर सर्वाधिक गोलकर्ता, उत्कृष्ट खेलाडी, उत्कृष्ट गोलरक्षक, उत्कृष्ट रक्षक, उत्कृष्ट मिडफिल्डरलाई ट्रफीबाट पुरस्कृत गरिने जनाइएको छ।
सो प्रतियोगिताको प्रत्येक खेलमा एकजना उत्कृष्ट खेलाडीलाई ‘म्यान अफ दि म्याच’ को ट्रफी प्रदान गरिने पत्रकार सम्मेलनमा जानकारी दिए। निजगढ–९ स्थित शहीद हीरालाल रङ्गशालामा सञ्चालन हुने प्रतियोगिता अन्तर्गत प्रत्येक दिन दुई चरणमा खेल सम्पन्न हुनेछ। प्रतियोगिता अवधिभर अनुशासित, मर्यादित भई उत्कृष्ट खेल प्रदर्शन गर्ने खेलाडीहरूको पहिचान गरी फूटबल टीम तयार गर्नेसमेत जनाएको छ।
