प्रस, रौतहट, २ कात्तिक/
रौतहटको मौलापुर नगरपालिका वडा नं ५ पतौरामा शनिवार राति चोर समूहले एक घरमा दम्पतीमाथि धारिलो हतियार प्रहार गरेर गम्भीर घाइते बनाएको छ।
३५ वर्षीय हरेन्द्र साह र उनकी पत्नी शिला देवीमाथि चोर समूहले धारिलो हतियार प्रहार गरी साङ्घातिक आक्रमण गरेका हुन्। धारिलो हतियारले हरेन्द्रको दाहिने कान र उनकी पत्नीको दाहिने पाखुरामा गम्भीर चोट लागेको छ।
उनीहरूको वीरगंजस्थित एलएस न्युरो अस्पतालमा उपचार भइरहेको र स्थिति सुधारोन्मुख रहेको जिल्ला प्रहरी कार्यालय रौतहटका प्रवक्ता प्रहरी नायब उपरीक्षक भरत श्रेष्ठले बताए।
राति करीब १ बजे साह दम्पती सुतिरहेको अवस्थामा अज्ञात समूहले दुवैजनामाथि धारिलो हतियारले आक्रमण गरेको थियो। प्रहरीका अनुसार घरमा चोर देखेर शिला देवीले होहल्ला गर्दा उनीमाथि पहिले र उनको पति हरेन्द्र जागेपछि उनीमाथि पछि आक्रमण भएको अनुमान छ। घटनाको अनुसन्धान तथा संलग्नको खोजी भइरहेको प्रवक्ता श्रेष्ठले बताएका छन्।
