काठमाडौं, २८ जेठ/रासस
आइसिसी टी–२ विश्वकप क्रिकेट प्रतियोगिता अन्तर्गत वेस्ट इन्डिजमा आयोजना हुने खेलमा नेपाली टोलीका स्पिनर सन्दीप लामिछाने खेल्ने भएका छन्। नेपाल क्रिकेट सङ्घ (क्यान)द्वारा सोमवार जारी विज्ञप्तिमा वेस्ट इन्डिजमा हुने दक्षिण अफ्रिका र बङ्गलादेशविरुद्ध खेलमा सन्दीपले सहभागिता जनाउने उल्लेख गरिएको छ। सन्दीप नेपाली राष्ट्रिय क्रिकेट टोलीमा समावेश हुँदै उक्त प्रतियोगिता खेल्न लागेका हुन्।
क्यानले यस अघि यही जेठ २ गतेदेखि सन्दीपलाई घरेलु तथा अन्तर्राष्ट्रिय सबै प्रकारका क्रिकेट खेल गतिविधिको निलम्बनबाट फुकुवा गरेको थियो। उच्च अदालत पाटनको फैसलाबमोजिम बलात्कार मुद्दामा सफाइ पाएसँगै क्यानले पनि सोही दिनदेखि क्रिकेट गतिविधिबाट निलम्बन फुकुवा गरेको थियो।
युवा बलर प्रतीश जिसीलाई ‘ट्राभलिङ रिजर्र्भ’ राख्दै सन्दीपलाई नेपाली टोलीमा समावेश गरेको क्यानका सचिव पारस खड्काले जानकारी दिए। सङ्घले पूर्वघोषित टीमबाट युवा बलर जिसीलाई ट्राभलिङ रिजर्भमा राख्ने निर्णय गर्दै सन्दीपलाई विश्वकप खेल्ने आधिकारिक १५ जना टोलीको अन्तिम नामावली आइसिसी सामु पेश गरेको क्यानको भनाइ छ।
विज्ञप्तिमा भनिएको छ– “यही जेठ ३ गतेदेखि नै सन्दीप नेपालको अफिसियल टीममा रहेका तर अमेरिकी राहदानी प्राप्त नभए पनि आइसिसीसँग समन्वय गरी वेस्ट इन्डिजमा हुने दक्षिण अफ्रिका तथा बङ्गलादेशविरुद्ध नेपालका दुई खेलमा सन्दीपको उपस्थिति रहने जानकारी गराउन चाहन्छौं।”
विश्वकप क्रिकेट २०२४ का खेल अमेरिका र वेस्ट इन्डिजमा भइरहेका छन्। अमेरिकामा भएको नेदरल्यान्ड्सविरुद्ध पहिलो खेलमा पराजित भएको नेपालले दोस्रो खेल यही जेठ ३० गते अमेरिकामैं श्रीलङ्गासँग खेल्नेछ। उक्त खेल खेलेपछि नेपाली टोली वेस्ट इन्डिजको सेन्ट भिसेन्ट पुग्नेछ। त्यहाँ नेपालले दक्षिण अफ्रिका र बङ्गलादेशसँग खेल्नेछ।
