काठमाडौं, १६ जेठ/रासस
नेपाल भलिबल सङ्घको आयोजनामा हुने आठौं प्रधानमन्त्री कप महिला तथा पुरुष भलिबल लिगको खेलतालिका बुधवार सार्वजनिक भएको छ।
त्रिपुरेश्वरस्थित राष्ट्रिय खेलकूद परिषद्को कभर्डहलमा यही जेठ १९ देखि २६ गतेसम्म आयोजना हुने उक्त प्रतियोगितामा पुरुषतर्फ आठ र महिलातर्फ छ टोलीको सहभागिता रहने आयोजकले जनाएको छ।
प्रतियोगिताको पुरुषतर्फ टिपटप हेल्प नेपाल स्पोट्र्स क्लब, सशस्त्र प्रहरी बलको एपिएफ, त्रिभुवन आर्मी क्लब, नेपाल पुलिस क्लबका साथै कोशी प्रदेश, गण्डकी प्रदेश, सुदूरपश्चिम प्रदेश र बूढानीलकण्ठ भलिबल क्लब रहेका छन्।
महिलातर्फ एभरेस्ट भलिबल क्लब बुटवल, नेपाल पुलिस क्लब, एपिएफ क्लब, चन्द्रागिरि न्यू डायमन्ड, त्रिभुवन आर्मी क्लब र कर्णाली प्रदेश भलिबल टीमले प्रतिस्पर्धा गर्नेछन्।
यही जेठ १९ गते हुने प्रतियोगिताको उद्घाटन खेलमा पुरुषतर्फ टिपटप हेल्प नेपाल र बूढानीलकण्ड क्लबबीच प्रतिस्पर्धा हुनेछ। पहिलो दिन पुरुषतर्फ चार र महिलातर्फ दुई गरी छ खेल हुनेछन्।
साथै पुरुषतर्फ नेपाल पुलिस र सुदूरपश्चिम स्पोट्र्स, एपिएफ र गण्डकी प्रदेश तथा त्रिभुवन आर्मी क्लब र कोशी प्रदेशबीच खेल हुनेछ। यसैगरी, उद्घाटन खेलको महिलातर्फ एपिएफ र चन्द्रागिरि न्यू डायमन्ड तथा नेपाल पुलिस क्लब र त्रिभुवन आर्मी क्लबबीच हुनेछ।
