नितेश कर्ण, वीरगंज, १४ जेठ/
वीरगंजमा जारी जिल्ला लिग फूटबल प्रतियोगिता अन्तर्गत सोमवार सम्पन्न तेस्रो दिनको खेलमा ग्यालेक्सी युथ क्लबले लालीगुराँस युवा क्लबलाई शून्यका विरुद्ध तीन गोलअन्तरले पराजित गरेको छ।
पर्सा जिल्ला फूटबल सङ्घको आयोजनामा आदर्शनगर खेलमैदानमा भएको आजको खेलमा मध्यान्तर अघि ग्यालेक्सी युथ क्लबका दीपेश जोशीले २६औं मिनेटमा पहिलो गोल गरेका थिए।
यसैगरी, मध्यान्तरपछि ग्यालेक्सी युथ क्लबका रोहन क्षत्रीले ४५औं मिनेटमा र लगत्तै ४६औं मिनेटमा दीपेश जोशीले अर्काे गोल गरी तीन गोलको अन्तर पारे। खेल अवधिमा लालीगुराँस युवा क्लबले गोलरहित खेल्यो। आजको खेलमा दुई गोल गरेका दीपेश जोशी ‘म्यान अफ दी म्याच’ घोषित भए।
यही जेठ २६ गतेसम्म जारी रहने प्रतियोगितामा जिल्लाका १३ वटा क्लब सहभागी भएका आयोजक क्लबका महासचिव विनोद परियारले बताए।
