काठमाडौं, ८ जेठ/ रासस
नेपाल विलियड्र्स स्नुकर तथा पुल सङ्घको आयोजनामा पहिलो काठमाडौं स्नुकर च्याम्पियनशिप–२०२४ को आयोजना हुने भएको छ। यही जेठ १९ देखि २९ गतेसम्म आयोजना हुने उक्त प्रतियोगितामा विभिन्न १६ क्लबका २५६ जना खेलाडीले प्रतिस्पर्धा गर्ने आयोजक समितिका अध्यक्ष सरोजकुमार मुल्मीले मङ्गलवार आयोजित पत्रकार सम्मेलनमा जानकारी दिए। उनले नेपालमा स्नुकर खेलको विकास र विस्तारका लागि उक्त प्रतियोगिताको आयोजना गर्न लागेको बताए।
प्रतियोगितामा प्रथम स्थान हासिल गर्ने खेलाडीले रु दुई लाख ५१ हजार प्राप्त गर्नेछन्। त्यसैगरी, पहिलो रनरअप खेलाडीले रु एक लाख पाउनेछन् भने सेमिफाइनलमा पुग्ने खेलाडीले रु ५० हजार पाउनेछन्। त्यसैगरी, क्वाटरफाइनलमा पुग्ने खेलाडीले रु १० हजार तथा प्रि–क्वाटर फाइनलमा पुग्ने खेलाडीले रु पाँच हजार पाउनेछन्। प्रतियोगितामा उत्कृष्ट चयन हुने खेलाडी र उत्कृष्ट राइजिङ खेलाडीले जनही रु १५ हजार पाउनेछन्।
