प्रमोद यादव, पंचगावाँ, २० फागुन/
सबडिभिजन वन कार्यालय, रङ्गपुरटाँडीले तीन थान सालको गोलियासहित साइकल नियन्त्रणमा लिएको छ ।
जमदार अर्जुन चौधरी नेतृत्वको वनगस्ती टोलीले पटेर्वासुगौली गाउँपालिका–२ स्थित बेलवा जाने सडकखण्डबाट आइतवार बिहान तीनवटा साइकलमा लोड गरिएका तीनवटा सालको गोलिया नियन्त्रणमा लिएको हो ।
वन कर्मचारीलाई देखेपछि तस्करहरू साइकल र गोलिया छाडेर फरार भएका थिए । बरामद गोलिया र साइकल सबडिभिजन वन कार्यालय, रङ्गपुरटाँडीमा राखिएको रेन्जर कपिलदेव यादवले बताए । बरामद गोलिया २५ क्युफिट रहेको र सोको मूल्य ७० हजार रहेको उनले बताए । रङ्गपुरस्थित राष्ट्रिय वनजङ्गलबाट कटान गरिएको काँचो सालको गोलिया कौवावन र देउरवानाको चिरान मिलमा लैजाने क्रममा बरामद भएको उनले बताए ।
