चिरञ्जीवी सापकोटा, ठोरी, १० मङ्सिर/
पर्साको सुदूरपश्चिम पालिका ठोरी गाउँपालिकामा एकजना वृद्धको हत्या भएको छ। ठोरी गापा–२ गौतमनगरका ८२ वर्षीय लक्ष्मण लामाको हत्या भएको हो।
उनका नाति ३६ वर्षीय कृष्णबहादुर खड्काले कोदो चुट्ने लाठीले प्रहार गरी वृद्धको हत्या गरेको इलाका प्रहरी कार्यालय, ठोरीका प्रहरी निरीक्ष्Fक सन्तोष राईले जानकारी दिए। उनका अनुसार घरनजीकै छिमेकीको घरमा छोरीका छोरा (नाति) खड्काले कोदो चुटिरहेको अवस्थामा हजुरबुबाले ‘तिमी छाडिदेऊ म चुट्छु’ भन्दा आवेगमा खड्काले लाठी प्रहार गरेका थिए।
टाउकोमा गम्भीर चोट लागेर अचेत भएका वृद्धलाई उपचारको लागि ठोरी गापा–२ स्थित स्वास्थ्य चौकीमा लैजाँदै गर्दा बाटोमा उनको मृत्यु भएको थियो। घटनापश्चात् गाउँलेहरूले लुकेको अवस्थामा खड्कालाई पक्राउ गरी प्रहरीलाई बुझाएका थिए।
वृद्धको शव शल्यपरीक्षणको लागि वीरगंज पठाइएको प्रनि राईले बताए।
