प्रस, वीरगंज, १५ असार/
बारा प्रहरीले लागूऔषध गाँजा ठूलो परिमाणमा बरामद गरेको छ ।
गएराति ९ बजे जीतपुरसिमरा उपमहानगर–७ जीतपुर बजारनजीकबाट रोकिराखेको अवस्थामा बिआर २५ जिए १४५८ नम्बरको भारतीय ट्रकबाट २६२ किलो गाँजा बरामद गरेको हो ।
इलाका प्रहरी कार्यालय, सिमरा र प्रहरी चौकी पथलैयाको संयुक्त टोलीले गाँजा बरामद गरेको बाराका प्रहरी उपरीक्षक होबिन्द्र बोगटीले बताए । मकवानपुरबाट वीरगंज नाका हुँदै ठूलो परिमाणमा गाँजा तस्करी भइरहेको पूर्वसूचनाको अधारमा भारतीय ट्रकको खोजी शुरू गरिएको थियो ।
बिहीवार दिनभरि उक्त ट्रक जीतपुरमैं सडकछेउमा रोकिएको अवस्थामा स्थानीय जनप्रतिनिधिको रोहबरमा ट्रकको हुड खोलेर हेर्दा फल्स बटम बनाइ राखिएको अवस्थामा गाँजा बरामद भएको थियो । ट्रक प्रहरी नियन्त्रणमा छ भने चालकको खोजी कार्य भइरहेको बारा प्रहरीका प्रवक्ता प्रनाउ पुरुषोत्तम पाण्डेले बताए ।
आठवटा पाकेटमा ३० किलोको दरले २४० किलो र २२ किलोको अर्काे एउटा प्याकेट गरी कुल २६२ किलो गाँजा भारत लैजाने तस्कर गिरोहको तयारी थियो ।
बारा प्रहरीले चालू आवको असार १५ गतेसम्म करीब एक हजार २३०.४५० किलोग्राम गाँजा बरामद गरिएको र ६८ जना नेपाली नागरिक र चारजना भारतीय नागरिक गरी ७२ जनालाई पक्राउ गरिएको जिप्रका, बाराले जनाएको छ ।
