खरगोन, २६ वैशाख/एएनआई
मध्य प्रदेशको खरगोन जिल्लामा मङ्गलवार एक निजी यात्रीवाहक बस पुलबाट खस्दा कम्तीमा १५ जनाको मृत्यु भएको छ भने २५ जना घाइते भएका छन् ।
सो घटना मङ्गलवार बिहान जिल्लाको ओन प्रहरी चौकी अन्तर्गत दसङ्गा क्षेत्र नजीकै डोङ्गरगाउँँ पुलमा भएको हो । घटनाको जानकारी पाएलगत्तै प्रहरी प्रशासन र एम्बुलेन्स घटनास्थलमा पुगेर उद्धार कार्य शुरू गरेको थियो ।
खरगोनका प्रहरी उपरीक्षक (एसपी) धरमवीर सिंहले भने, “खरगोनको पुलबाट बस खसेर १५ जनाको मृत्यु भएको छ भने २५ जना घाइते भएका छन् । उद्धार कार्य जारी छ ।”
प्रदेश सरकारले दुर्घटनामा ज्यान गुमाउनेका परिवारलाई रू चार लाख, गम्भीर घाइतेलाई रू ५० हजार र सामान्य घाइतेलाई रू २५ हजार तत्काल उपलब्ध गराउने घोषणा गरेको छ ।
घटनाबारे अनुसन्धान जारी छ । रासस
