प्रस, वीरगंज, २० फागुन/
पोखरिया नगरपालिका–९ सिमखरी चोक स्थित ना ४२ प १७५९ नम्बरको मोटरसाइकल पोखरिया नगरपालिकामा दुर्घटना हुँदा पछाडि बस्ने पर्सा जगरनाथपुर गाउँपालिका–५ मसिहानी का ४५ वर्षीय चोकट मुखिया बिनको मृत्यु भएको छ ।
पोखरिया जाँदै गरेको मोटरसाइकल अनियन्त्रित भएर हिजो राति १० बजे दुर्घटना भएको थियो ।
दुर्घटनामा परी बिन र चालक पोखरिया नगरपालिका–३ फुलवरिया टोल बस्ने ३९ वर्षीय विश्वजीतराउत गिरी घाइते भएका थिए । घाइते बिनको उपपचारको क्रममा पोखरिया अस्पतालमा मृत्यु भएको र अर्का घाइते गिरीलाई उपचारको लागि नारायणी अस्पताल वीरगंज पठाइएको थियो ।
यसैगरी कलैया उपमहानगरपालिका–१४ हनुमान मन्दिर नजीक हिजो साँझ मोटरसाइकलको ठक्करबाट घाइते भएका एकजनाको आज दिउँसो उपचारको क्रममा मृत्यु भएको बारा प्रहरीले जनाएको छ ।
बघवनबाट कलैयातर्फ आउँदै गरेको, स्थानीय सागर चौधरीले चलाएको ना २ प ९७०५ नं. को मोटरसाइकलले पैदल यात्री कलैया उमनपा–९ रामपुर टोलका ३५ वर्षीय रहिम अंसारीलाई ठक्कर दिएको थियो । ठक्करबाट घाइते भएका अंसारीको शनिवार दिउँसो वीरगंज हेल्थकेयर अस्पतालमा उपचारको क्रममा मृत्यु भएको हो । प्रहरीले मोटरसाइकल र चालकलाई नियन्त्रणमा लिएको छ ।
यसैगरी आफैंले चलाएको मोटरसाइकल अनियन्त्रित भएर दुर्घटना भएर घाइते भएका भारत छौडादानो निवासी भैयाराम साहको शनिवार उपचारको क्रममा मृत्यु भएको छ । फागुन १५ गतेको घटनामा घाइते साहको आज मृत्यु भएको बारा प्रहरीले जनाएको छ । मोटरसाइकल पछाडि बसेको सन्देश साह भने घाइते भएका थिए ।
