इस्लामाबाद, २ असोज/एएनआई
अविरल वर्षाका कारण आएको बाढी र त्यसबाट प्रभावित पाकिस्तानको सिन्ध प्रान्तका ९० हजारजनालाई एकैदिन जलजन्य रोगको उपचार गरिएको छ । प्रान्तीय स्वास्थ्य विभागका अनुसार गत बिहीवार बाढी प्रभावित ९२,७९७ नागरिकलाई जलजन्य सङ्क्रामक रोगबाट जोगाउन चिकित्सा सेवा प्रदान गरिएको हो ।
सोही दिन १७,९७७ जना झाडाबान्ताका, २०,०६४ जना छालाका रोगी र २८ जना डेङ्गुका रोगी थपिएका विभागले जनाएको छ । बाढी प्रभावित क्षेत्रमा स्थापना गरिएका अस्थायी र घुम्ती अस्पतालबाट हालसम्म २३ लाख बिरामीले सेवा लिएका छन् ।
पाकिस्तानका विभिन्न भागमा आएको बाढीमा परी १,५०८ जनाको मत्यु भएको छ । बितेको २४ घण्टामा थप २२ जनाको ज्यान गएको छ । सोही अवधिमा नौजना घाइते भएका छन् । बाढीमा परी घाइते हुनेको सङ्ख्या १२,७५८ पुगेको छ । बाढीबाट ३० अर्ब डलर बराबरको भौतिक सम्पत्ति नष्ट भएको छ ।
संयुक्त राष्ट्रसङ्घ र सरकारले तापक्रम वृद्धिमा भएको बढोत्तरीले वर्षा भएको र त्यसले भीषण बाढी निम्त्याएको बताएका छन् । पाकिस्तानका विदेशमन्त्री बिलावल भुट्टोले जलवायु परिवर्तनका कारण पाकिस्तानले भोगेको समस्या अन्य देशले पनि सामना गर्नुपर्ने परिस्थिति उत्पन्न हुन सक्ने बताएका छन् ।
उनले धनी देशले जलवायु परिवर्तनको जिम्मेवारी लिनुपर्ने बताएका छन् ।
आफ्नो देशमा परेको अविरल वर्षाको प्रभावलाई उल्लेख गर्दै उनले सिन्धमा १०० किलोमिटर चौडा ताल बनेको र त्यसले आवासीय क्षेत्रमा असर गरेको बताए । रासस
