प्रस, वीरगंज, १७ भदौ/
बारा जिल्लाको महागढीमाई नगरपालिकामा एकजना पतिले भाउजूसँग मिलेर पत्नीको हत्या गरेको पुष्टि भएको छ। महागढीमाई नगरपालिका वडा नं ३ गंजभवानीपुर टोलका २७ वर्षीय सैमुद्दीन अन्सारीले भदौ १६ गते २५ वर्षीया भाउजू अप्साना खातुनसँग मिलेर पत्नी शहनाज खातुनको हत्या गरेको जिल्ला प्रहरी कार्यालय, बाराका प्रहरी निरीक्षक रामकाजी थापाले बताए।
भदौ १६ गते महागढीमाई नगरपालिका–३ गंजभवानीपुर बस्ने सैमुद्दीनकी पत्नी २५ वर्षीया शहनाज खातुन घरमा मृत फेला परेकी थिइन्। अनुसन्धानको क्रममा प्रहरीले पत्नीको हत्यामा पति सैमुद्दीन र भाउजू अप्साना खातुनको संलग्नता देखेपछि निजहरूलाई हिजै पक्राउ गरेको प्रनि थापाले बताए। उनले पक्राउ परेका दुवैजनालाई कर्तव्य ज्यान मुद्दामा बारा जिल्ला अदालतबाट सात दिनको म्याद थप गरी अनुसन्धान भइरहेको बताए।
