प्रस, गरुडा, २४ असार÷
बज्जिका भाषा र साहित्यको लागि रौतहटमा क्रियाशील बज्जिका साहित्य सङ्गम रौतहटको पचासौं साहित्य गोष्ठीको अवसरमा दुई प्रतिभालाई सम्मानित गरिएको छ । यसैगरी, दुईजनाको संयुक्त कृति बज्जिका भाषा र मिडियाको पनि लोकार्पण गरिएको छ ।
रौतहटको गरुडा नगरपालिकास्थित नगरसभा कक्षमा नगरप्रमुख कन्थमणिप्रसाद कलवारले बज्जिका साहित्यकार विश्वराज अधिकारीलाई तुलसी साहित्य पुरस्कार र बज्जिका अनुसन्धानकर्मी गिरिजा अधिकारीलाई सङ्गम सम्मान २०७९ बाट सम्मानित गरिएको थियो ।
यसैगरी, नगरप्रमुख कलवारले सञ्जय साह मित्र र गिरिजा अधिकारीको संयुक्त अनुसन्धानात्मक कृति बज्जिका भाषा र मिडियाको संयुक्त लोकार्पण गरेका थिए ।
नगरप्रमुख कलवारसँगै पूर्व जिल्ला शिक्षा अधिकारी बालदेवप्रसाद साह, सर्लाहीका साहित्यकार रामचन्द्र महतो कुशवाहा, अमेरिकी लेखक विश्वराज अधिकारी र बिन्दा साहनीले कृतिको संयुक्त लोकार्पण गरेका थिए ।
नगरप्रमुख कलवारले बज्जिका भाषा र साहित्यको क्षेत्रमा निकै प्रगति भएको बताउँदै नगरपालिकाको तर्फबाट आफूले निरन्तर सहयोग गरिरहने बताएका छन् । बज्जिका भाषाको क्षेत्रमा हरेक दिन केही न केही कार्यक्रम भइरहेको देखेर आफूलाई खुशी लागेको बताउँदै नगरप्रमुख कलवारले बज्जिका भाषासँगै संस्कृतिको पनि विकास भइरहेको स्पष्ट पारेका थिए ।
कार्यक्रमलाई सम्बोधन गर्दै पूर्व जिल्ला शिक्षा अधिकारी बालदेव साहले बज्जिका भाषा र साहित्यको विकासका लागि अक्षयकोषमा पचास हजार रुपैयाँ सहयोग गर्ने प्रतिबद्धता व्यक्त गरेका थिए ।
गरुडाका समाजसेवी धर्मनाथप्रसाद जयसवालले स्थापना गरेको डेढ लाख रुपैयाँको अक्षयकोषबाट सञ्चालनमा रहेको तुलसी साहित्य पुरस्कार प्राप्त गरेपछि अमेरिकी लेखक विश्वराज अधिकारीले आफूले बज्जिकाको अर्को कृति पनि लेख्ने घोषणा गरेका थिए । बज्जिका भाषामा अधिकारीका दुई कृति प्रकाशित छन् ।
बज्जिका सङ्गम सम्मान प्राप्त गरेपछि अनुसन्धानकर्मी गिरिजा अधिकारीले बज्जिका भाषा र साहित्यको विकासमा आफूले थप सहयोग गर्न तयार रहेको बताउँदै एउटा ठोस कार्य गर्ने प्रतिबद्धता व्यक्त गरेका थिए ।
कार्यक्रममा गरुडा नगरपालिकाकी उपप्रमुख पूनमकुमारी चौधरी, बज्जिका भाषा विकास परिषद् नेपालका अध्यक्ष शिवचन्द्रप्रसाद साह, साहित्यकार रामचन्द्र महतो कुशवाहा, नेपाल पत्रकार महासङ्घ, रौतहटका सचिव मदन ठाकुर, सर्लाहीका साहित्यकार मनमोहन सिंह मनोहर, राजेन्द्र ठाकुर, नवसर्जक चौतारी नेपाल मधेस प्रदेश अध्यक्ष रूवि गुप्ता, बिन्दा साहनीलगायतले मन्तव्य गर्दै बज्जिका भाषा र साहित्यको क्षेत्रमा आफूले सकेको योगदान दिने बताएका थिए ।
सर्लाही, रौतहट, बारा, पर्सा र मकवानपुरका बज्जिका भाषासेवी तथा साहित्यकारको सहभागिता रहेको कार्यक्रमको अध्यक्ष बज्जिका साहित्य सङ्गम, रौतहटका अध्यक्ष किशुनदयाल श्रीकृष्ण र सञ्चालन सञ्जय साह मित्रले गरेका थिए ।
