बलिराम शुक्ला, बिरुवागुठी, १७ माघ/
क्रियाशील युवा पत्रकार मञ्च नेपाल वीरगंजले नेपाल पत्रकार महासङ्घका नवनिर्वाचित केन्द्र, प्रदेश तथा जिल्लाका पदाधिकारी सदस्यहरूलाई बिहीवार सम्मान गरेको छ ।
कार्यक्रममा प्राध्यापक मञ्जु श्रेष्ठले पत्रकारिता समाजको दर्पण भएकोले निष्पक्ष र स्वतन्त्ररूपले पत्रकारिता गर्न सुझाव दिइन् । उनले पहिले महिलाहरू शिक्षा लिन नचाहने तर अहिले पत्रकारहरूको कलमका कारण महिलाहरू पनि निर्धक्क भएर उच्च शिक्षा लिइरहेको बताइन् । प्राध्यापक श्रेष्ठले पत्रकारको कलमकै कारण देशविदेशमा ठूलठूला परिवर्तन भएको बताइन् ।
कार्यक्रममा वीरगंज उद्योग वाणिज्य सङ्घका अध्यक्ष अनिल अग्रवाल, उपाध्यक्ष हरि गौतम, केन्द्रीय सदस्य सुबोध गुप्ता, नेपाल पत्रकार महासङ्घ केन्द्रीय लेखा समिति संयोजक केसी लामिछाने, पत्रकार महासङ्घ, पर्साका अध्यक्ष ओमप्रकाश खनाल, डा नीरज सिंह, प्रेस काउन्सिल नेपालका सदस्य लालबाबू शेखलगायतले मन्तव्य राखेका थिए ।
कार्यक्रममा महासङ्घका निर्वाचित पदाधिकारी तथा सदस्यहरूलाई रुद्राक्षको माला, गम्छा र सम्मानपत्रले सम्मानित गरिएको थियो ।
मञ्चका अध्यक्ष प्रणयकुमार साहको अध्यक्षमा भएको कार्यक्रममा स्वागत क्रियाशील युवा पत्रकार मञ्चका उपाध्यक्ष आनन्द पटेल र सहजीकरण वीरेन्द्र साहले गरेका थिए ।
